خطوات هادئة للكاتبة شيمو الحلقة الرابعة

الحلقه الرابعه
غمض عنيه وبدأ يتخيل شكلها وينادي عليها تجيله
محمود: ساري انا محتاجلك تعالي...ساري ارجوكي تعالي ...ساري
محمود حس ببروده فظيعه وحس بقلبه هيقف والمكان بيظلم وبيحصل نفس 

اللي بيحصله في الحلم...وسأل نفسه معقول ساري هتتخلي عني وهتعمل
فيا زي الحلم؟؟...خاف وقلبه بيدق بسرعه ومستني انه يروح القبور زي 
الحلم وفجأه.......كل شيء رجع لطبيعته وشافها واقفه قدامه جميله حلوه 
وقلبه رجع يدق تاني بعنف...ازاي فكر ينساها ولو للحظه؟؟؟بس ده مش 
وقته هو عايز يفهم منها ايه اللي بيحصله؟؟؟؟
ساري: عايز مني ايه؟؟انت مش نسيتني؟عايزني ليه تاني؟
محمود: انتي كدبتي عليا فكان لازم اتصرف كده
ساري: انا ما كدبتش عليك ابدا
محمود: ماكدبتيش ممكن بس خبيتي عني الحقيقه
ساري: حقيقه ايه اللي خبيتها عنك؟؟؟
محمود: ان انا لو اخترت احبك وافضل معاكي..هفضل هنا جسم من غير 
روح وروحي هتكون معاكي انتي...انا ليا حياتي هنا وليا والدتي مسئول 
عنها ومش عايز....
قاطعته ساري: ايه اللي انت بتقوله ده؟؟؟مين طلب منك تتخلي عن 
حياتك هنا؟؟؟...ومين قالك اني هاخد روحك؟؟؟
محمود: هتكدبي تاني؟؟؟
ساري: مش بكدب...لو حبيتني انا اللي بخسر روحي ...انا اللي روحي 
هتفضل معاك هنا...انا اللي المفروض اخاف منك مش انت
محمود: يعني ايه؟؟؟لا انتي بتكدبي عليا...وبعدين لو بتحبيني اصلا 
مكنتيش تعذبيني كل يوم وتاخديني في رحلتك للمقابر وتعذبي فيا انتي 
واهلك
ساري: ايه؟؟؟مين بيعذبك؟؟؟
محمود: اعملي نفسك مش عارفه حاجه بقي
ساري: وحياتك انت ما اعرفش اي حاجه
محمود: احلفي بحاجه غير حياتي ..احلفي بحاجه ليها قيمه عندك
ساري: انت اغلي حاجه عندي..وعلشان كده حلفت بيك
محمود بصلها ومش عارف يصدقها ولا يكدبها؟؟؟حاسس من جواه انها 
صادقه...بس خايف يخاطر تاني
ساري حست بيه وطبعا عرفت تقري افكاره لانها عندها المقدره دي غير 
امها اللي لازم تلمس الشخص علشان تقدر تدخل عقله
محمود: ما تحاوليش تدخلي عقلي لو سمحتي
ساري: اسفه...بس اسمعني الاول....وانا مش هكدب عليك في كلمه واحده 
اوعدك
محمود: قولي اللي عندك
ساري: عشيرتنا بتعيش بقلب بس قلب ميت بيدق مره واحده بس لو قابل 
تؤام روحه وبأيدنا نوقفه لو حبينا بس لو وقف مش بيدق تاني ابدا وبيعيش 
الواحد في حاله مراره العمر كله وعمره ما بيحس باي شيء تاني بيفقد 
احساسه بكل اللي حواليه...لو اختار ان قلبه يفضل يدق يبقي بيدمج حياته 
معاه وبيبقوا روح واحده هما الاتنين..ده لما بيحصل في عشيرتنا بيبقي 
شيئ جميل جدا لان احنا مش بنخون ابدا ولو اتنين اندمجوا بيفضلوا مع 
بعض عمرهم كلوا وبيفضل الحب ديما موجود بينهم
محمود: ولو حصل زي كده بين اتنين مختلفين انا وانتي مثلا؟؟؟
ساري: ساعتها بيكون قدامي اختيارين يا اما اوقف قلبي وساعتها هعيش 
في مراره عمري كله زي ما شرحتلك او اختار اني افضل احبك 
وساعتها هتكون حياتي بين ايديك
محمود: يعني ايه حياتك بين ايديا؟؟؟
ساري: يعني لو انت اخترت تحبني ووافقت تندمج معايا هكون اسعد 
مخلوق في الدنيا ..ولو نسيتني بعدها هعيش انا من غير روح لان روحي 
هتفضل معاك هنا وكل لحظه تعدي اتعذب انا فيها وكل ضحكه تضحكها 
بالف الف طعنه ليا وافضل عايشه جسم مش بيتحرك ولا عايش جسد من 
غير روح زي ما انت قلت
محمود: ولو فضلت احبك علي طول؟؟
ساري: هكون قويه وسعيده ولو عايز ممكن اعيش معاك هنا ..ده طبعا لو 
عايز؟
محمود: يعني ايه تعيشي معايا هنا؟؟؟وتعيشي ازاي ؟؟جنيه؟؟؟
ساري: مش لازم حد يعرف اني جنيه...هظهر بشكلي ده ومش لازم ابدا 
حد غيري انا وانت يعرف
محمود: قصدك انك انتي ممكن تعيشي معايا هنا زي اي انسانه عاديه؟؟؟
ساري: لو انت عايز كده ايوه؟؟
محمود: ولو بطلت احبك او نسيتك؟؟
ساري: اليوم اللي تبطل تحبني فيه برجع لعشيرتي محطمه مدمره من غير 
روح زي ما قولتلك
محمود: وانا؟؟؟هيكون مصيري ايه؟؟؟كوابيس مدي الحياه واشد انواع 
الانتقام من اهلك....صح؟؟؟؟؟
ساري: لا
محمود: لا؟؟؟؟ده اللي بيحصل دلوقتي ..بمجرد ما صرفتك وانا بتعذب 
ايه اللي هيخليهم يبطلوا؟؟ ده بالعكس دلوقتي علي الاقل انتي لسه 
محتفظه بقوتك وقلبك وحياتك امال لما تخسري ده كله هيعملوا فيا 
ايه؟؟؟؟
ساري: محدش يقدر يلمسك او ياذيك....لو تم الاندماج بيننا محدش ابدا 
يقدر يأذيك باي شكل من الاشكال....اندماجي معاك هو بوليصه تأمينك
محمود: انت عايزه تفهميني ان اندماجننا بيديني انا كل الصلاحيات وبياخد 
منك كل حاجه؟؟؟طيب وده ليه؟
ساري: ده امان للبشر مننا دي قوانين عليا محدش يقدر يدخل فيها..دي 
حاجات اللي خلقنا عملها علشان يحميكم انتو مننا ...الظاهر ان الانسان 
الكائن المفضل .....مهما يكون ضعيف الي ان مش اي مخلوق يقدر 
يأذيه..ديما ليكم وسائل حمايه بتحميكم مننا
محمود: يعني دي قوانين ربنا حطها علشان يحمينا منكم؟؟؟؟وانتي ايه 
اللي يخليكي تخاطري بكل شيئ كده؟؟؟؟؟؟
ساري: علشان بحبك
هنا محمود قلبه كان بيدق بعنف لانه هو كمان بيحبها ومش عارف ليه؟؟
الاحساس اللي جواه محسوش قبل كده
محمود:ده برضه ما يمنعش انك بتعذبيني.. انتي عارفه انا بتعذب قد ايه؟
ساري:اسفه هحاول اتصرف...محمود انت مش محتاج لشيخ علشان 
تصرفني..انت مش عارف انت بتعذبني قد ايه؟؟؟؟لو مش عايزني كفايه 
كلمه منك وانا هبعد وهمنع اي حد يقرب منك...
دمعه نزلت من عينها غصب عنها
ساري: لو عايز ابعد عنك نهائي هبعد وومكن كمان اوقف قلبي وساعتها 
محدش ابدا يقدر يأذيك...قرر انت بس 
محمود: للدرجه دي بتحبيني؟؟؟لدرجه انك توقفي قلبك وتعيشي في مرار 
ساري: لو ده ثمن سعادتك مستعده ليه؟؟؟
محمود: ولو انا بحبك وعايزك تفضلي معايا هنا وعايزك تندمجي معايا 
علي الرغم اني مش عارف يعني ايه اندماج بس حاسس انه حاجه حلوه
ساري ضحكت ضحكه مخطوفه
محمود: ياه اخيرا ضحكتي
ساري: بجد يا محمود بتحبني؟
محمود جاوبها بانه باسها ..قد ايه كان مشتاق للحظه دي ..رعشه قلبه بين 
ايديها دقات قلبه بالطريقه دي...مكنش عارف هيا واحشاه قد ايه غير لما 
لمس شفايفها ..كانت بوسه شوق طويله مليانه حب وعتاب ولهفه واخيرا 
بعد عنها بس ماسكها كأنه خايف انها تختفي تاني من قدامه
محمود: مختلفه؟
ساري: ايه هيا اللي مختلفه؟
محمود: بوستك المره دي مختلفه...روحي ما اتسحبتش مني 
ساري: وده كويس ولا لأ؟
محمود: طبعا كويس ...كنت خايف ان كل ما ابوسك احس ان قلبي بيقف 
وروحي بتتسحب مني..لكن المره دي كانت متعه صافيه..متعه وبس لدرجه 
اني مش عايز ابطل ابوسك
ابتسمت ساري
ساري: اول مره كانت صعبه...

محمود: خليكي معايا هنا علي طول
ساري: حاليا مش هينفع..في امور لازم تتسوي الاول مع اهلي وبعدها 
اكون ملك ايدك
محمود: مش هتقوليلي يعني ايه اندماج
ساري: اندماج بلغتك انت يعني جواز
محمود: تكوني مراتي؟؟؟امي لو عرفت ان مرات ابنها هتبقي جنيه ممكن 
قلبها يقف فيها؟
ساري: خلاص متعرفهاش
محمود: طيب ينفع نتجوز امتي؟
ساري: محتاجه وقت اتصرف فيه مع اهلي ..وبعدين لازم اعرف مين 
اللي بيعذبك علشان اعرف احميك..لو حسيت باي شيئ نادي عليا وانا 
هاجي
محمود: خلاص اتفقنا............استني رايحه فين؟
ساري: لازم امشي دلوقتي وهجيلك تاني
سابته ومشيت وهو حس انه اسعد انسان في الدنيا
رجعت ساري لعشيرتها وموات كانت معاها
ساري: انا لازم اتصرف يا موات
موات: ايه ده قلبك بيدق كده ليه؟؟؟انتو رجعتو لبعض؟؟؟انتي مجنونه 
ابوكي هيعمل ايه لو عرف؟؟
ساري: ابويا بيعذب فيه وانا لازم اقف قصاده
موات: تقفي قدام ابوكي؟؟؟الملك؟انتي متخيله نفسك ايه؟ده ممكن 
يقتلهولك ببساطه
ساري: ايه يقتله؟؟؟موات اعمل ايه؟
موات: معرفش ..دلوقتي بتسألي ؟كان لازم تعرفي هتعملي ايه قبل ما قلبك 
يرجع يدق بالطريقه دي تاني
ساري: وبعدين
موات: اولا قلبك لازم يبطل دق
ساري: لايمكن ابدا انتي فاهمه لايمكن
موات: انا مش قصدي توقفيه..انا قصدي نلاقي طريقه نخبي بيها دقات 
قلبك..لحد ما نشوف هنعمل ايه..وانا هشوف اي تعويذه بس انتي مش لازم 
حد ابدا يشوفك حاليا
ساري: خلاص محدش هيشوفني بس انتي هاتي التعويذه بسرعه..... 
طيب ومحمود؟؟
موات: لو قلبك بطل يدق محدش هيفكر يأذيه
جابت موات كل تعاويذ السحر وبدأت تدور علي تعويذت تخفي بيها دقات 
قلب ساري
موات: لقيتها
ولسه بتقراها سمعوا صوت ايتوكان وبينادي علي ساري بصوا لبعض 
بخوف لو سمع قلبها هيحبسها تاني وهيأذي حبيبها..خطواته بتقرب وتقرب 
لحد ما اخيرا دخل وفتح الباب
ايتوكان: انتي مش بتردي ليه؟؟؟
ونكمل بكره
ياتري ايتوكان هيأذي محمود ولا ساري هتعرف تحميه؟؟؟
موات هتلحق تقري التعويذه بسرعه ولا هيتكشفوا؟؟؟
محمود هيندمج مع ساري ولا حاجه هتمنع الاندماج ده؟؟
انتو ايه رأيكم؟؟؟
انا مش عايزه حلوه وتحفه انا عايزاكم تتحاوروا معايا وتقولو متوقعين ايه يحصل 
مستنيه تعليقاتكم

تعليقات

المشاركات الشائعة من هذه المدونة

من أنت +18 ؟ للكاتبة / sweet-smile مكتملة

قربان